Ялгаварлан гадуурхахыг хориглоно
Ажил олгогч нь гадаад ажилчин гэсэн шалтгаанаар ялгаварлан гадуурхаж болохгүй.(「Гадаад ажилчны ажил эрхлэлтийн тухай хууль」 22-р зүйл).
Хөдөлмөрийн гэрээ байгуулах
Ажил олгогч гадаад ажилчин ажилуулах гэж байгаа бол заавал стандарт хөдөлмөрийн гэрээ байгуулах ёстой бөгөөд, зөрчсөн тохиолдолд 5,000,000 хүртэл воноор торгох шийтгэл ноогдуулдаг(「Гадаад ажилчны ажил эрхлэлтийн тухай хууль」 9-р зүйлийн 1-р заалт болон 32-р зүйлийн 1-р заалтын 1).
Шууд, бүхэлд нь, тогтмол цалин олголт
Цалинг бэлэн мөнгөөр шууд, бүхэлд нь сар бүр нэгээс дээш удаа, тогтмол өдөр товлон олгож байх ёстой бөгөөд, зөрчсөн тохиолдолд 3 жил хүртэл хугацаагаар шоронд хорих ял юм уу 30,000,000 хүртэл воноор торгох шийтгэл ноогдуулдаг. Харин энэ тохиолдолд хохирогчийн тодорхой илэрхийлсэн гомдлын дагуу шийдвэрлэх ёстой(「 Хөдөлмөрийн тухай хууль」-ийн 43-р зүйл болон 109-р зүйл).
Хөдөлмөрийн хөлсний доод хэмжээнээс дээш цалин олгох
Гадаад ажилчны цалингийн хэмжээг заавал солонгос ажилчинтай адил хэмжээгээр тогтоох шаардлагагүй бөгөөд ажлын туршлага болон ажлын бүтээмжээс хамаарч ялгаатай олгож болно.
「 Хөдөлмөрийн хөлсний доод хэмжээний тухай хууль」-ийн дагуу хөдөлмөрийн хөлсний доод хэмжээнээс дээш цалин олгох ёстой бөгөөд, хөдөлмөрийн хөлсний доод хэмжээ гэсэн шалтгаанаар өмнө авч байсан цалингийн хэмжээг бууруулж болохгүй(「 Хөдөлмөрийн хөлсний доод хэмжээний тухай хууль」 6-р зүйл).
※ Гэрийн ажилд туслуулж байгаа ажил олгогчид(гэрийн үйлчлэгч, цэцэрлэгч, зэрэг гэрийн ажилд туслуулахаар ажилчин хөлслөн ажиллуулж буй хүн) 「 Хөдөлмөрийн хөлсний доод хэмжээний тухай хууль」 үйлчлэхгүй.
Ажлын цаг болон илүү цагаар ажиллах
Ажлын цаг нь амралтын цагийг хасаад 1 өдөрт 8 цаг, 1 долоо хоногт 40 цагаас илүү байж болохгүй хэдий ч(20-оос доош тооны ажилчинтай газар 1 долоо хоногт 44 цаг ажиллана), талууд харилцан тохиролцсон тохиолдолд 1 долоо хоногт 12 цаг хүртэл илүү цагаар ажиллаж болно(「 Хөдөлмөрийн тухай хууль」 50-р зүйл болон 53-р зүйлийн 1-р заалт).
※ Энэхүү заалтыг зөрчсөн тохиолдолд 2 жил хүртэл хугацаагаар шоронд хорих ял юм уу 20,000,000 хүртэл воноор торгох шийтгэл ноогдуулдаг(「 Хөдөлмөрийн тухай хууль」 110-р зүйлийн 1).
Ажил олгогч нь ажилчныг илүү цаг, амралтын өдөр, шөнийн цагаар ажиллуулсан бол дор дурдсан хэмжээнээс дээш дүнтэй мөнгийг нэмж олгоно(「 Хөдөлмөрийн тухай хууль」- ийн 56-р зүйл).
- Илүү цагаар ажиллах: Тогтмол цалингийн 50%
- 8 хүртэл цагаар амралтын өдөр ажиллах: Тогтмол цалингийн 50%
- 8-аас илүү цагаар амралтын өдөр ажиллах: Тогтмол цалингийн 100%
- Шөнийн цагаар ажиллах(Үдээс хойш 10 цагаас маргааш өдрийн үдээс өмнө 6 цаг хүртэл ажиллах): Тогтмол цалингийн 50%